上海的天，一出梅，马上畀侬颜色看，高温，连续高温。
7月4号就出梅，要到8月7号再立秋，立了秋还有秋老虎，有得热了。
这两天，马路上，地铁上，办公室里，商场里，听到最最多的对话恐怕就是下面这段：
“哦哟，热煞了，汗汤汤滴，哪能吤热啦。”
“是热嗰呀，气象预报讲今朝明朝侪是37℃。”
“啥？37℃？根本弗罢嗰，起码40℃！”
喏，问题来了。讲大家侪会得讲，不过，这个罢字为啥迭能写法呢？
先要讲清爽的是，现在交关年纪轻的，已经不这样讲了。而是讲“弗止嗰”。讲“弗止嗰”还算文雅的，再粗一点，就是“七嘴八搭”“瞎七搭八”“瞎讲有啥讲头啦”。再粗一点，“放屁”“滚蛋”之类的也要滑出来了。
那么，弗罢的罢字为啥要迭能写法呢？
讲穿了就不稀奇了，也邪气简单，就是“罢休”的“罢”。
“弗止”的“止”是停，“弗罢”的“罢”也是停。“药弗能停”也可以讲“药弗能罢”。
“弗止”的“止”有结束的意思，“弗罢”的“罢”也有结束的意思。
热得这副腔调，只报37℃，这桩事体哪能可以停下来，哪能可以结束，哪能可以就算了？般要争过明白。
“弗罢”用得最多的，除了气温，还有两个地方。一个是人数，一个是价钿。
讲人数就要讲到排队。
“前头还有三四十个人。”“弗罢嗰，起码五十个。”
“听说房价又要涨了，这次起码又要涨个几千块。”“啥地方罢过啦。”
老底子，这个“罢”字，在上海言话里用得还是不少的。
比方讲下面两句，我一讲出来，大家一定会觉得熟悉。一句是，“三弗罢四弗休”；还有一句就是“说说罢了”。
弄堂里厢吵相骂，长庄可以听到：“本来也就算了，喏，侬迭能讲，我倒要‘三弗罢四弗休’，搅过明白了。”
再比如：“人家已经弗响了，侬还在穷讲做啥？哪能迭能‘三弗罢四弗休’嗰啦？”
另外一句还蛮常见。
“侬听伊嗰，伊啊，说说罢了。真嗰伊弗敢做。”相当于现在的“口炮党”。讲过算数，并无实际行动。
讲起来，这个“罢”字，好像又是从苏州言话里来的。
老早很多描写老上海青楼生活的旧小说，一大半用苏白。因为当年，苏州清倌人最上档次，所以，嬉戏其间，讲苏白也上档次。
比方讲，《最近上海秘密史》第二十五回里，就有这样一句：
“余多的钱哪里罢这点子，现楼上还多起了一万多洋钱呢。”
顺便一提，“余多”也是老苏州话，老上海话。现在侪讲“其他”了。老实讲，好听还是“余多”好听。
除了“弗罢”的“罢”，老早上海言话里的“罢”字还可以用在别的场化。
比方讲，真的是“罢休”的意思，也只讲一个“罢”字。
《海上花列传》第九回：
“俚吃仔亏转去，俚朵娘姨大姐，相帮朵陆里一个肯罢啊。”
讲“完结”的意思，则讲两个字：“罢哉”。
还是《海上花列传》第六十一回：
“常恐三公子勿来嗰哉呢，乃末真真罢哉。”
如果要讲“不可缺少”的意思，就讲三个字，“罢弗得”。
不晓得大家还有印象没，年节里，屋里要招待客人，茶几上摆点啥呢？一家人家就会得打商量：“不管哪能，瓜子总归‘罢弗得’嗰。”“水果也总归‘罢弗得’嗰。”
这种讲法，已经交关年数不听见了。我家也不讲了。
《缀白裘》第五集第三卷有句：
“罢不得讨吤一个家主婆，浆洗浆洗衣裳，烧烧火，煮煮饭，扫扫地。”
意思是，讲来讲去，总归要……
还有啥个“罢”的用法，当然“弗罢”这些。
不过，语言（当然包括方言）像一条河流，歇歇在变。新陈代谢很正常。我在这里讲，并不是想“三弗罢四弗休”，不过“说说罢了”。
